МАГАДЛАГЧ ЭМЧ НАРЫГ МЭРГЭЖЛИЙН СУРГАЛТАД ХАМРУУЛЛАА
Нийгмийн даатгалын ерөнхий газрын дэргэдэх Эрүүл мэндийн магадлалын төв зөвлөлөөс “Нүдний өвчний орчин үеийн оношилгоо, эмчилгээ, хөдөлмөрийн чадвар алдалтын хувь, хугацааг тогтооход анхаарах асуудал” сэдэвт сургалтыг 2025 оны 05 дугаар сарын 12-13-ны өдрүүдэд зохион байгуулав.
Нүдний өвчнөөр хөдөлмөрийн чадвар алдсан 13000 орчим иргэн байгаа бөгөөд энэ нь нийт хөдөлмөрийн чадвар алдсан иргэдийн 12.5 хувийг эзэлж, тэргүүлэх өвчлөлийн нэг болоод байгаа юм.
Сургалтад аймаг, дүүргийн Нийгмийн даатгалын газрын магадлагч эмч нар оролцсон бөгөөд Нийгмийн даатгалын багц хууль болон эрүүл мэндийн магадлалтай холбоотой эрхзүйн баримт бичгийн хэрэгжилтийн талаар болон хөдөлмөрийн чадвар алдалтын зонхилох шалтгаан болж буй нүдний өвчний орчин үеийн оношилгоо, эмчилгээ, авлигын гэмт хэрэг ба авлигын хор хөнөөл, ажлын байрны стресс менежментийн хичээл зааж, эмч нарын асуултад хариулт өгч, санал солилцов.
Энэхүү сургалтыг Монголын торлог шилэнцрийн мэргэжлийн нийгэмлэг, Анагаахын шинжлэх ухааны үндэсний их сургуулийн түшиц эмнэлэг “Сондра” болон “Болор мэлмий”, “Орбита”, “Солонго” нүдний эмнэлгүүдтэй хамтран зохион байгуулж, Магадлагч эмч нарт нүдний өвчний оношилгоо, эмчилгээний талаар хичээл зааж, дээрх эмнэлгүүдэд дадлага хийлгэн чадавхжуулж нийт оролцогчдод багц цагийн сертификат олгосноороо онцлог ач холбогдолтой болов.
ЭРҮҮЛ МЭНДИЙН МАГАДЛАЛЫН ТӨВ ЗӨВЛӨЛ
