ДАРГЫН ЗӨВЛӨЛИЙН ХУРАЛ БОЛЛОО

Нийгмийн даатгалын ерөнхий газрын даргын зөвлөлийн өргөтгөсөн хурал 2025.07.08-ны өдөр болж, 21 аймаг, 9 дүүргийн Нийгмийн даатгалын газрын дарга нар цахимаар оролцлоо. Хурлаар Сэлэнгэ аймгийн Нийгмийн даатгалын газарт хийсэн хяналт шалгалтын дүнгийн танилцуулга, Ахлахуудын зөвлөлөөс Сумдын нийгмийн даатгалын байцаагч, ажилтнуудын судалгааны үр дүн, санал, Стресс менежментийн судалгааны үр дүн, санал, Нийгмийн даатгалын сангийн 2026 оны төсвийн төсөөлөл, 2027-2028 оны төсөөллийн танилцуулгын талаар хэлэлцлээ.

Сэлэнгэ аймагт хийгдсэн хяналт шалгалтаар илэрсэн зөрчлийг арилгах, цаашид зөрчил гаргахгүй байхад анхаарч ажиллахыг даргын зөвлөлөөс үүрэг болголоо. Мөн ахлахуудын зөвлөлөөс боловсруулсан Сумдын байцаагчдын ажил үүргийн талаарх судалгааг дахин сайжруулан боловсруулах, нийгмийн даатгалын байгууллагын ажилтнуудын стресс менежментийн талаарх судалгааг 21 аймаг, 9 дүүргээс авч санал нэгтгэж боловсруулахыг онцоллоо.

2026 оны төсвийн төсөөлөл, 2027-2028 оны төсвийн хүрээний мэдэгдлийг  үндэслэлтэй боловсруулж, Гэр бүл, хөдөлмөр нийгмийн хамгааллын яам болон Нийгмийн даатгалын үндэсний зөвлөлд хүргүүлэх чиглэлийг даргын зөвлөлөөс өглөө.