АЖЛЫН ХЭСЭГ ХУРАЛДЛАА

Нийгмийн даатгалын сангийн өр төлбөрийг барагдуулах зарим арга хэмжээний талаар Гэр бүл, хөдөлмөр, нийгмийн хамгааллын сайд Т.Аубакир Засгийн газрын гишүүдэд танилцуулснаар Засгийн газрын 2025 оны 12 дугаар хуралдааны тэмдэглэл гарсан.

Энэхүү тэмдэглэлд банк, санхүүгийн байгууллагаас авах эд хөрөнгийг боловсрол, эрүүл мэнд, нийгмийн салбарт үйл ажиллагаа явуулж байгаа төрийн байгууллагад шилжүүлэх, худалдан борлуулах болон бусад арга замаар нийгмийн даатгалын санд төлөх өр, төлбөрийг барагдуулах асуудлыг судалж, саналаа 2025 оны 4 дүгээр улиралд багтаан Засгийн газрын хуралдаан танилцуулахыг Гэр бүл, хөдөлмөр, нийгмийн хамгааллын сайд, Сангийн сайд, Боловсролын сайд, Соёл, спорт, аялал, жуулчлал, залуучуудын сайд нарт тус тус даалгасан.

Энэхүү ажлын хүрээнд Гэр бүл, хөдөлмөр, нийгмийн хамгааллын сайдын 2025 оны “Ажлын хэсэг байгуулах тухай” А/199 дүгээр тушаалаар байгуулагдсан ажлын хэсгийн хурлыг 2025 оны 11 дүгээр сарын 05-ны өдөр Нийгмийн даатгалын ерөнхий газарт зохион байгууллаа.

Ажлын хэсгийн хурлаар Капитал банк болон Чингис хаан банкны нийгмийн даатгалын санд төлөх өр, төлбөрийн барагдуулалт, өр төлбөрт тооцон хүлээн авсан үл хөдлөх хөрөнгийн талаарх мэдээллийг ажлын хэсгийн гишүүдэд танилцуулж, харилцан санал, мэдээлэл солилцлоо.

Ажлын хэсгийн бүрэлдэхүүнд Монгол банк, Гэр бүл, хөдөлмөр, нийгмийн хамгааллын яам, Боловсролын яам, Сангийн яам, Соёл, спорт, аялал, жуулчлал, залуучуудын яам, Шүүхийн шийдвэр гүйцэтгэх ерөнхий газар, Улсын ерөнхий прокурорын газар, Капитал банк ХХК дахь Банкны эрх хүлээн авагч, Чингис хаан банкны төлөөллүүд ажиллаж байна.

Цаашид Капитал банк болон Чингис хаан банкнаас хүлээн авсан хөрөнгө болон өр төлбөрт санал болгосон хөрөнгүүдийг боловсрол, эрүүл мэнд, нийгмийн салбарт үйл ажиллагаа явуулж байгаа төрийн байгууллагуудад шилжүүлэх, худалдан борлуулах боломжтой эсэх талаар судалж, саналаа нэгтгэн Засгийн газрын хуралдаанд танилцуулахаар тогтлоо.