Танд туслах хэрэглэгчийн лавлах

7777-1289 11-328030
НүүрМэдээСАЛБАР ХООРОНДЫН СУРГАЛТ, ХЭЛЭЛЦҮҮЛЭГ  ЗОХИОН БАЙГУУЛЛАА

САЛБАР ХООРОНДЫН СУРГАЛТ, ХЭЛЭЛЦҮҮЛЭГ  ЗОХИОН БАЙГУУЛЛАА

САЛБАР ХООРОНДЫН СУРГАЛТ, ХЭЛЭЛЦҮҮЛЭГ  ЗОХИОН БАЙГУУЛЛАА

Нийгмийн даатгалын ерөнхий газрын дэргэдэх Эрүүл мэндийн магадлалын төв зөвлөлөөс Нийгмийн эрүүл мэндийн үндэсний төвтэй хамтран хөдөлмөрийн чадвар алдалтад нөлөөлж буй хүчин зүйл, түүнээс урьдчилан сэргийлэх, хөдөлмөрийн чадвар алдалтын үнэлгээний тогтолцоог боловсронгуй болгох асуудлаар “Эрүүл чанартай амьдарлын төлөө” сэдэвт салбар хоорондын сургалт, хэлэлцүүлгийг 2026 оны 11 дүгээр сарын 13-ны өдөр зохион байгууллаа.

Тус арга хэмжээнд ГБХНХЯ, ЭМЯ, ЦХИХХЯ, Нийгмийн даатгалын үндэсний зөвлөл, тус газрын дэргэдэх Мэдээллийн технологийн төв, Хөдөлмөр, халамж, үйлчилгээний ерөнхий газар, Хөгжлийн бэрхшээлтэй хүний ерөнхий газар, Нэгдсэн үндэсний байгууллагын хүүхдийн сан, Эрүүл мэндийн хөгжлийн төв, Сэтгэцийн эрүүл мэндийн үндэсний төв, Хөдөлмөрийн аюулгүй байдал, эрүүл мэндийн төв зэрэг байгууллагууд болон дүүргийн Нийгмийн даатгалын газрын дэргэдэх Эрүүл мэндийн магадлалын зөвлөлийн гишүүдийн төлөөлөл бүхий нийт 60 гаруй оролцогч оролцов.

Сургалт, хэлэлцүүлгийг Гэр бүл, хөдөлмөр, нийгмийн хамгааллын сайдын зөвлөх Г.Саран, Нийгмийн даатгалын үндэсний зөвлөлийн гишүүн Г.Адъяа нар нээж хэлсэн үгэндээ эрүүл мэндийн магадлалын үйл ажиллагаа нь зөвхөн нэг салбарын асуудал биш салбар хоорондын хамтын ажиллагаа бөгөөд олон улсын жишиг, туршлагад нийцүүлэн шинэчлэх, мөн хөдөлмөрийн чадвар алдалтыг тогтоогоод орхих бус эмчлэн эрүүлжүүлэх, нөхөн сэргээх тусламж үйлчилгээний чанар, хүртээмжийг нэмэгдүүлэх, нийгмийн оролцоог хангаж, хөдөлмөр эрхлэлтийг дэмжих шаардлагатай байгаа талаар онцлон тэмдэглэлээ.

Сургалт, хэлэлцүүлгийн үеэр Эрүүл мэндийн магадлалын төв зөвлөлийн дарга Т.Лхагвадорж “Хөдөлмөрийн чадвар алдалтын өнөөгийн байдал, тулгамдаж буй асуудлууд, цаашид хэрэгжүүлэх арга хэмжээний санал” сэдвээр, мөн хөгжлийн бэрхшээлтэй иргэдийн хөдөлмөр эрхлэлтийг дэмжих бодлого, олон улсын үйл ажиллагаа (ICF)-ны үнэлгээ болон нэвтрүүлэх боломж, олон улсын туршлага, сэтгэцийн өвчний шалтгаант хөдөлмөрийн чадвар алдалтыг үнэлэхэд сэтгэлзүйн оношилгоо, сорилын хэрэглээний талаар ГБХНХЯ, ЭМЯ, Нэгдсэн үндэсний байгууллагын хүүхдийн сан зэрэг байгууллагуудаас илтгэл тавьж, мэдээлэл өгөв.

Арга хэмжээний хоёрдугаар хэсэгт “Хөдөлмөрийн чадвар алдалтаас урьдчилан сэргийлэх, бууруулах, шийдвэрлэх үйл ажиллагааг сайжруулах чиглэлээр ирээдүйн чиг хандлагыг тодорхойлох” сэдэвт хэлэлцүүлгийг нээлттэй өрнүүлж, үнэлгээний өнөөгийн тогтолцооноос хүний үйл ажиллагааны чадамж, нийгмийн оролцоог харгалзсан үнэлгээний загварт үе шаттай шилжүүлэх асуудлыг хөндөж, олон улсын үйл ажиллагааны ангилал (ICF)-ыг нэвтрүүлэх бодлого, эрхзүйн зохицуулалт, санамсаргүй хуваарилалтын аргаар цахимаар шийдвэрлэх тогтолцоог зохион байгуулах асуудлаар санал солилцлоо.

 

Мэдээлэл хариуцагч: Мэдээллийн технологи, сурталчилгаа хариуцсан ахлах мэргэжилтэн Г.Урангоо Утас:72721289