“НИЙГМИЙН ХАМГААЛЛЫН ТУХАЙ МОНГОЛ УЛС БОЛОН БҮГД НАЙРАМДАХ АВСТРИ УЛС ХООРОНДЫН ХЭЛЭЛЦЭЭР”-ИЙН ХҮРЭЭНД ЭРХ БҮХИЙ БАЙГУУЛЛАГУУДЫН ХООРОНД МЭДЭЭЛЭЛ СОЛИЛЦОХ МАЯГТЫГ ХЭЛЭЛЦЭХ УУЛЗАЛТ БОЛЛОО
Монгол Улсын Ерөнхийлөгч У.Хүрэлсүхийн урилгаар Бүгд Найрамдах Австри Улсын Ерөнхийлөгч Александр Ван дер Беллэн Монгол Улсад 2025 оны 05 дугаар сард хийсэн төрийн айлчлалын үеэр “Нийгмийн хамгааллын тухай Монгол Улс болон Бүгд Найрамдах Австри Улс хоорондын хэлэлцээр”-т Бүгд Найрамдах Австри Улсын Европ, олон улсын харилцааны яамны Ерөнхий нарийн бичгийн дарга болон Гэр бүл, хөдөлмөр, нийгмийн хамгааллын сайд нар гарын үсэг зурж баталсан.
Тус хэлэлцээрийг хэрэгжүүлэх удирдлагын тохиролцоонд Монгол Улсын талаас Гэр бүл, хөдөлмөр, нийгмийн хамгааллын сайд Т.Аубакир, Бүгд Найрамдах Австри улсын талаас Хөдөлмөр, нийгмийн хэрэг, эрүүл мэнд, асрахуй, хэрэглэгчийг хамгаалах сайд Коринна Шуман нар 2025 оны 09 дүгээр сарын 16-ны өдөр гарын үсэг зурсан.
Энэхүү хэлэлцээрийн хэрэгжилтийг хангах, ослын даатгалын тогтолцоог судлах ажлын хүрээнд 2025 оны 9 дүгээр сарын 16-19-ний өдрүүдэд Бүгд Найрамдах Австри Улсын Вена хотод харилцагч байгууллагуудын хооронд мэдээлэл солилцох Монгол Улсаас Бүгд Найрамдах Австри Улс руу илгээх 8 төрлийн маягт, Бүгд Найрамдах Австри Улсаас Монгол Улс руу илгээх 8 төрлийн маягт, нийт 16 маягтыг хэлэлцэж харилцан санал солилцлоо.
Бүгд Найрамдах Австри Улсын нийгмийн даатгал, ослын даатгалын талаар Австрийн даатгалын холбооны Багийн ахлагч Александра Бруннер, Монгол Улсын Нийгмийн даатгалын тогтолцооны талаар Нийгмийн даатгалын ерөнхий газрын дарга Б.Батжаргал нар тус тус илтгэл тавьж, харилцан мэдээлэл солилцон сонирхсон асуултад хариулт өглөө.
Нийгмийн хамгааллын тухай Монгол Улс болон Бүгд Найрамдах Австри Улс хоорондын хэлэлцээрийн хэрэгжилтийн хүрээнд солилцох Холбогдох хууль тогтоомжийн гэрчилгээ, Мэдэгдэл, Тэтгэвэр тогтоолгох өргөдөл, Монгол Улсад/ Австри Улсад даатгуулсан бүртгэлийн гэрчилгээ, Эмнэлгийн дэлгэрэнгүй дүгнэлт, Бодит зардлын мэдэгдэл, Статистик мэдээлэл, Холбогдох зүйл, заалтын хэрэгжилтйн статистик мэдээлэл зэрэг маягтуудыг хэлэлцэж нэгдмэл саналд хүрлээ.
2024 оны байдлаар Бүгд Найрамдах Австри Улсад Монгол Улсын 2,800 иргэн оршин сууж байгаагаас 1,696 иргэн ажил хөдөлмөр эрхэлж байгаа бол Монгол Улсад Австри Улсын 100 орчим иргэн оршин сууж байна. Хэлэлцээр хэрэгжсэнээр хоёр улсын иргэдийн нийгмийн хамгааллын асуудал шийдвэрлэгдэх чухал ач холбогдолтой юм.
