Нийгмийн даатгалын ерөнхий газраас “Монгол Улсын Засгийн газар, Бүгд Найрамдах Казахстан Улсын Засгийн газар хоорондын тэтгэврийн асуудлаар хамтран ажиллах тухай хэлэлцээр”-ийг 2026 оны 04 дүгээр сарын 01-ний өдрөөс хэрэгжүүлж эхлэхтэй холбогдуулан 2026 оны 03 дугаар сарын 31-ний өдөр цахим сургалт зохион байгууллаа. Сургалтад аймаг, дүүргийн Нийгмийн даатгалын газрын дарга, Тэтгэвэр, тэтгэмжийн хэлтсийн дарга, тэтгэврийн хяналтын болон тогтоолт олголтын байцаагч, мэргэжилтнүүд зэрэг 100 гаруй албан хаагч оролцлоо.
Сургалтаар Бодлогын хэрэгжилт, төлөвлөлтийн газрын дарга Ц.Ганцэцэг “Монгол Улсын Засгийн газар, Бүгд Найрамдах Казахстан Улсын Засгийн газар хоорондын тэтгэврийн асуудлаар хамтран ажиллах тухай хэлэлцээр”-ийг хэрэгжүүлэхэд анхаарах асуудлын талаар чиглэл, зөвлөмж өглөө. Тухайлбал, Хэлэлцээрийн хамрах хүрээ, тэтгэвэр тогтоох, олгох, ажиллаж шимтгэл төлсөн хугацааг нэгтгэн тооцох, тэтгэврийг шилжүүлэх, Хэлэлцээрийн хүрээнд хэрэглэх маягтуудыг хэрхэн хөтлөх, эрх бүхий байгууллагуудын холбоо барих хаягын талаар мэдээлэл, аймаг, дүүргийн Нийгмийн даатгалын газруудын хэлэлцээрийн хэрэгжүүлэхтэй холбоотой чиг үүргийн талаар зөвлөмжийг тус тус өгч холбогдох асуултад хариуллаа.
Хэлэлцээр хэрэгжиснээр хоёр улсын иргэд Монгол Улс болон Бүгд Найрамдах Казахстан Улсад 1998 оны 01 дүгээр сарын 01-ний өдөр хүртэл ажиллаж шимтгэл төлсөн давхцаагүй хугацааг нэгтгэн өндөр насны тэтгэвэр тогтоолгох, Монгол Улсын иргэд Бүгд Найрамдах Казахстан Улсаас хуримтлалын тэтгэврийг тогтоолгон авах боломж бүрдэх юм.
