ГАЗРЫН ДАРГЫН ӨРГӨТГӨСӨН ЗӨВЛӨЛИЙН ХУРАЛ БОЛЛОО
Нийгмийн даатгалын ерөнхий газрын даргын өргөтгөсөн зөвлөлийн хурал 2026 оны 04 дүгээр сарын 17-ны өдөр боллоо. Хурлаар Нийгмийн даатгалын сангийн 2025 оны санхүүгийн нэгтгэсэн тайлангийн танилцуулга, Хан-Уул дүүргийн Нийгмийн даатгалын газарт ажилласан ажлын тайлан, Коллпро үйлчилгээний тухай хэрэгжилтийн үр дүн, Сүхбаатар, Баянгол дүүргүүдэд зохион байгуулсан Эрүүл мэндийн магадлалын төв зөвлөлийн хамтарсан магадлалын танилцуулгыг тус тус сонсож хэлэлцлээ.
Хан-Уул дүүргийн Нийгмийн даатгалын газарт хяналт шалгалтаар илэрсэн зөрчлийг арилгуулахаар Нийгмийн даатгалын ерөнхий газрын даргын 2026 оны “Ажлын хэсэг байгуулах, удирдамж батлах тухай” А/76 дугаар тушаалаар баталсан удирдамжийн дагуу Үйлчилгээ хөгжүүлэлт, олон нийттэй харилцах газрын дарга Б.Батсүхээр ахлуулсан ажлын хэсэг 2026 оны 03 дугаар сарын 27-оос ажлын 10 өдрийн хугацаанд ажиллаж холбогдох хэд хэдэн зөрчлүүдийг арилгаж, шимтгэлийн өртэй 378 ажил олгогчийн 7.1 тэрбум төгрөгийн төлбөрийг барагдуулсан байна.
Нийгмийн даатгалын байгууллага нь иргэд, даатгуулагчид, ажил олгогч, харилцагчдад нийгмийн даатгалын үйлчилгээний талаарх мэдээллийг шуурхай, хүртээмжтэй хүргэх, үйлчилгээний чанарыг сайжруулах зорилгоор “CallPro” ХХК-тай хамтран “CALLPRO VOICE” үйлчилгээг нэвтрүүлэн ажиллаж, тодорхой үр дүнд хүрч байгаа ч иргэдийн дуудлага алдалтын түвшин төдийлөн буурахгүй байгаа тул дуудлагын хүлээгдэл болон алдалтыг бууруулах ажлыг эрчимжүүлж ажиллахыг Даргын зөвлөлөөс үүрэг болголоо.
Мөн Засгийн газрын 2026 оны “Төрийн байгууллагын үйл ажиллагааны талаар авах зарим арга хэмжээний тухай” 119 дүгээр тогтоолын хэрэгжилт, 2026 оны 04 дүгээр сарын 25-ны өдөр зохион байгуулагдах Улсын байцаагчийн эрх олгох шалгалттай холбоотой мэдээлэл өгөгдлөө. Энэхүү шалгалтад 269 албан хаагч оролцох бөгөөд албан хаагчид улсын байцаагчийн эрх авч, иргэд ажил олгогч даатгуулагч, харилцагчдад мэргэжлийн түвшинд төрийн үйлчилгээг үзүүлж ажиллахыг зөвлөлөө. Нийгмийн даатгалын байгууллагын албан хаагчид Улсын байцаагчийн шалгалтад тэнцэн эрх авснаар мэргэжлийн ур чадвартай, мэргэшсэн болохоос гадна цалин хөлс нэмэгдэх, мэргэшлийн зэрэгтэй болж, улмаар зэргийн нэмэгдэл авах боломж бүрдэх юм.
