БНСУ-ЫН ҮНДЭСНИЙ ЭРҮҮЛ МЭНДИЙН ДААТГАЛЫН ГАЗРЫН ТӨЛӨӨЛӨГЧИДТЭЙ ХАМТАРСАН УУЛЗАЛТ ЗОХИОН БАЙГУУЛЛАА
Өнөөдөр буюу 2026 оны 11 дүгээр сарын 20-ны өдөр Нийгмийн даатгалын ерөнхий газар, Эрүүл мэндийн даатгалын ерөнхий газар болон БНСУ-ын Үндэсний эрүүл мэндийн даатгалын газрын төлөөлөгчдийн хамтарсан уулзалт боллоо.
Энэхүү уулзалт нь БНСУ-ын Үндэсний эрүүл мэндийн даатгалын газрын төлөөлөгчдөд Нийгмийн даатгалын байгууллагын үйл ажиллагааг танилцуулах, эрүүл мэндийн даатгалын шимтгэлийн орлого төвлөрүүлэлтийн талаар харилцан мэдээлэл солилцох зорилготойгоор зохион байгуулагдсан юм.
Уулзалтын эхэнд НДЕГ-ын дарга Б.Батжаргал уулзалтыг нээж үг хэлэн, Монгол Улсын нийгмийн даатгалын байгууллагын өнөөгийн үйл ажиллагаа, бүтэц, зохион байгуулалт болон эрүүл мэндийн даатгалын шимтгэлийн орлого төвлөрүүлэлтийн чиглэлээр ямар чиг үүргийг хэрхэн хэрэгжүүлдэг талаар дэлгэрэнгүй танилцуулга хийлээ.
Үргэлжлүүлэн БНСУ-ын Үндэсний эрүүл мэндийн даатгалын газрын Гадаад хамтын ажиллагаа хөгжлийн газрын дэд дарга Ли Сон Күү (Lee Sung Koo) тус байгууллагын үйл ажиллагааны туршлага болон одоо хэрэгжүүлж буй “Монгол Улсын эрүүл мэндийн даатгалын санхүүгийн удирдлагын чадавхийг бэхжүүлэх” хамтарсан төслийн явц, үр дүнгийн талаар мэдээлэл өглөө.
Уулзалтын төгсгөлд талууд сонирхсон асуултдаа хариулт авч, цаашдын хамтын ажиллагаа, туршлага солилцох чиглэлээр санал солилцлоо.







