БАЯНХОНГОР АЙМГИЙН НИЙГМИЙН ДААТГАЛЫН ГАЗРЫН ШИНЭ БАРИЛГА АШИГЛАЛТАД ОРЛОО
Баянхонгор аймгийн Нийгмийн даатгалын газар стандартад нийцсэн, иргэдэд үйлчлэх таатай орчинг бүрдүүлсэн шинэ барилгатай боллоо. Тус аймгийн Нийгмийн даатгалын газрын хуучин барилга нь 1978 онд аж ахуйн аргаар сувиллын зориулалтаар баригдсан, 2 давхар, 583.3 м.кв талбай бүхий байгууламж байсан бөгөөд төрийн үйлчилгээний байгууллагын орчны эрүүл ахуйн шаардлага, стандартыг хангахгүй байгаа талаар Мэргэжлийн хяналтын байгууллагаас 2021 онд дүгнэлт гаргасан.
Үүний дагуу шинэ барилга барих асуудлыг аймаг, орон нутгийн зүгээс үе шаттайгаар тавьж ирсний үр дүнд тус байгууллага орчин үеийн шаардлага, стандартад нийцсэн шинэ барилгатай болж, албан ёсоор ашиглалтад оруулан, Баянхонгор аймгийн иргэд, даатгуулагчдад үйлчилгээг нийгмийн даатгалын үзүүлж эхэллээ.
Барилгын нээлтийн үйл ажиллагаанд Нийгмийн даатгалын ерөнхий газрын дарга Б.Батжаргал Баянхонгор аймгийн Засаг дарга Э.Энхбат, НДЕГ-ын Газрын зөвлөлийн гишүүд, 8 аймгийн Нийгмийн даатгалын газрын дарга нар, тус байгууллагын анхны дарга Х.Энэбиш болон үе үеийн удирдлага, албан хаагчид, холбогдох албаны хүмүүс оролцов.
Нийгмийн даатгалын ерөнхий газрын дарга Б.Батжаргал шинэ барилгын нээлтийн үеэр хэлсэн үгэндээ тус байгууллага шинэ байртай болсноор Баянхонгор аймгийн 90.0 мянга орчим иргэд, даатгуулагч, ажил олгогч, харилцагчдад төрийн үйлчилгээг илүү түргэн шуурхай, хүртээмжтэй, тав тухтай орчинд хүргэх нөхцөл бүрдэж байгааг онцлон тэмдэглэлээ.
