Удирдлагын мэндчилгээ
Эрхэм иргэд, даатгуулагчид, ажил олгогчид Та бүхэнд энэ өдрийн мэнд хүргэе.
Засгийн газрын хэрэгжүүлэгч агентлаг Нийгмийн даатгалын ерөнхий газар нь улсын хэмжээнд нийгмийн даатгалын хууль тогтоомжийг хэрэгжүүлэх, нийгмийн даатгалын сангийн орлогыг бүрдүүлэх, хамралтыг нэмэгдүүлэх, нийгмийн даатгалын сангаас тэтгэвэр, тэтгэмж, төлбөр, зардлыг хуулиар тогтоосон хугацаанд олгох, нийгмийн даатгалын үйлчилгээг шуурхай, хүртээмжтэй үзүүлэх чиг үүргийг аймаг, нийслэл, дүүргийн нийгмийн даатгалын хэлтэс (газар)-ээр болон БНСУ-д Нийгмийн даатгалын тасгаар дамжуулан хэрэгжүүлж байна.
Засгийн газрын 2020-2024 оны үйл ажиллагааны хөтөлбөрт тусгагдсан “Цахим монгол” арга хэмжээний хүрээнд бид нийгмийн даатгалын үйлчилгээг шуурхай, хүртээмжтэйгээр цаг хугацаа, орон зайнаас үл хамааран үзүүлэх зорилгоор нийт 34 үйлчилгээний 75 хувийг цахим хэлбэрт шилжүүллээ. Тухайлбал, ажил олгогчоос шимтгэл төлөлтийн тайлан хүлээн авах, сайн дурын даатгалын гэрээ байгуулах, шимтгэл төлөх, эмнэлгийн хуудас олгох, ажилгүйдлийн, хөдөлмөрийн чадвар түр алдсаны, жирэмсний болон амаржсаны тэтгэмжийн хүсэлт гаргах, шимтгэл төлөлтийн лавлагаа, тодорхойлолтыг төрийн үйлчилгээний нэгдсэн систем “E-Mongolia”, “Даатгуулагчийн веб”, “Нийгмийн даатгал” аппликейшнээр дамжуулан үзүүлэхээс гадна даатгуулагч шимтгэл төлөлтөө хянах, нэрийн дансны орлого, тэтгэвэр, тэтгэмжийн мэдээллээ цахимаар авах нөхцөлийг бүрдүүлээд байна. Цаашид нийгмийн даатгалын мэдээллийн системийг шинэчлэн нийгмийн даатгалын үйлчилгээг бодит горим (рийл тайм)-оор үзүүлэх ажлыг үе шаттай хэрэгжүүлж, 2023 онд цахим шилжилтийг бүрэн хийхээр зорин ажиллаж байна.
Иргэд, даатгуулагчид, ажил олгогчид Та бүхэн манай цахим хуудаснаас нийгмийн даатгалын хууль тогтоомж, үйлчилгээ, нийгмийн даатгалын сангийн статистик, нээлттэй өгөгдөл, цахим үйлчилгээ, цаг үеийн мэдээ, нийгмийн даатгалын байгууллагын үйл ажиллагааны мэдээллийг ил тод, нээлттэйгээр авах болон санал хүсэлтээ илэрхийлэх боломжтой юм.
Нийгмийн даатгалын ерөнхий газрын даргын албан үүргийг түр орлон гүйцэтгэгч Ц.Ганцэцэг