Монгол Улс, Бүгд Найрамдах Унгар Улстай Нийгмийн хамгааллын хэлэлцээр байгуулж, Нийгмийн хамгаалал хөдөлмөрийн сайд Т.Ганди БНУУ-д айлчлах үеэрээ гарын үсэг зурсан билээ.

Тэгвэл уг хэлэлцээрийг Унгарын Улсын хурал соёрхон баталжээ. Ингэснээр хэлэлцээрийг манай улс соёрхон баталсан үед гэрээ шууд хэрэгжиж эхлэх боломжтой болж байгаа юм.

Энэхүү гэрээ хэрэгжиж эхэлсэнээр хоёр оронд тэтгэврийн даатгалын шимтгэл төлсөн хугацааг нэгтгэн тооцох, тэтгэврийг харилцан шилжүүлэн олгох таатай нөхцөл бүрдэх юм. Өөрөөр хэлбэл, Унгар улсад ажиллаж амьдарч байсан, мөн одоо ажиллаж амьдарч байгаа холбогдох хууль тогтоомжийн дагуу Нийгмийн даатгалын шимтгэл төлсөн Монгол иргэд эх орондоо ирсний дараа тэтгэвэр тогтоолгон авах боломжтой болж байгаа юм.

Тус улсад өнөөдрийн байдлаар хууль ёсоор 2000 гаруй хүн ажиллаж, амьдарч байгаа аж.