ДЭЛХИЙН БАНКНЫ ТӨЛӨӨЛӨГЧИД УРЬДЧИЛСАН ТАЙЛАНГАА ТАНИЛЦУУЛАВ
Нийгмийн даатгалын ерөнхий газраас Дэлхийн банкны техник туслалцааны хүрээнд улс орнуудын нийгмийн даатгалын тогтолцоонд хийдэг “Нийгмийн даатгалын удирдлага, зохион байгуулалтын шинжилгээ”-г хийлгэх хүсэлтийг Монгол дахь суурин төлөөлөгчийн газраар дамжуулан тавьсны дагуу уг шинжилгээг 2026 оны 02 дугаар сараас эхлэн хийлгэж, хамтран ажиллав.
Нийгмийн даатгалын ерөнхий газрын зүгээс шинжилгээ хийлгэхэд шаардлагатай баримт материалуудыг зөвлөх багт төлөвлөгөөт хугацаанд хүргүүлж ажилласан бөгөөд шинжилгээний урьдчилсан тайланг хэлэлцэх цахим уулзалтыг зохион байгуулав.
Уулзалтын эхэнд Дэлхийн банкны зөвлөх багийнханд Нийгмийн даатгалын ерөнхий газрын дарга Б.Батжаргал дэмжлэг үзүүлж хамтран ажиллаж байгаад талархал илэрхийлж, Нийгмийн хамгааллын бодлого, үйл ажиллагаа хариуцсан зөвлөх Майкл Кидд тайланг танилцуулж, Нийгмийн хамгааллын ахлах эдийн засагч Олексий Случинский нэмэлт тодруулга өгч, харилцан санал солилцлоо.
Шинжилгээний ажлын үр дүн бусад орнуудтай харьцуулахад харьцангуй эерэг гарсныг зөвлөх багийнхан онцолж, хөрөнгө оруулалтын нэгжийг өргөжүүлэх, дотоодын болон гадаадын хөрөнгийн зах зээлд хөрөнгө оруулж, төрөлжүүлэх, эрсдэлийн удирдлагын тогтолцоо, зохион байгуулалтын төлөвлөгөөг нарийвчлан боловсруулах, үйлчилгээний цахимжилтыг үргэлжлүүлж, түүнд суурилсан хамралтыг нэмэгдүүлэх болон хяналт шалгалтын ажлыг зохион байгуулах, төрийн бусад байгууллагатай мэдээлэл солилцох ажиллагааг өргөжүүлэх зэрэг зөвлөмжийг өгөв.
Дүгнэлт, зөвлөмжтэй холбогдуулан Нийгмийн даатгалын ерөнхий газрын дарга Б.Батжаргал, Бодлогын хэрэгжилт, төлөвлөлтийн газрын дарга Ц.Ганцэцэг нар тодруулга асуултуудыг асууж, тайланд тусгах саналуудаа уламжиллаа.
