МОНГОЛ УЛСАД ҮНДЭСНИЙ ЭРҮҮЛ МЭНДИЙН ДААТГАЛЫН ТОГТОЛЦОО НЭВТРҮҮЛЭХИЙН АЧ ХОЛБОГДОЛ, ХЭРЭГЦЭЭ БА АРГА ЗАМ СЭДВИЙГ ЭДИЙН ЗАСГИЙН ЧУУЛГАН ДЭЭР ХЭЛЭЛЦҮҮЛЭВ
МОНГОЛ УЛСАД ҮНДЭСНИЙ ЭРҮҮЛ МЭНДИЙН ДААТГАЛЫН ТОГТОЛЦОО НЭВТРҮҮЛЭХИЙН АЧ ХОЛБОГДОЛ, ХЭРЭГЦЭЭ БА АРГА ЗАМ СЭДВИЙГ ЭДИЙН ЗАСГИЙН ЧУУЛГАН ДЭЭР ХЭЛЭЛЦҮҮЛЭВ
2020-01-20

Монголын эдийн засгийн чуулганы хоёр дахь өдрийн салбар хуралдаанаар Монгол улсад үндэсний эрүүл мэндийн даатгалын тогтолцоо нэвтрүүлэхийн ач холбогдол, хэрэгцээ ба арга зам сэдвийг авч хэлэлцсэн. Салбар хуралдааныг Юнайтэд Фамели эмнэлгийн дэд ерөнхийлөгч Т.Болормаа удирдаж, УИХ-ын гишүүн С.Одонтуяа, УИХ-ын гишүүн Д.Сумъяабазар, Хавдар судлалын үндэсний төвийн захирал Л.Төмөрбаатар, Эрүүл мэндийн тогтолцоо болон санхүүжилтийн зөвлөх Ц.Нацагдорж, Азийн хөгжлийн банкны нийгмийн салбар хариуцсан мэргэжилтэн Ж.Алтантуяа нар оролцлоо.  

Эрүүл мэндийн салбарт засаглалын, тусламж үйлчилгээ үзүүлэлтийн, санхүүжилтийн гэсэн гурван үндсэн шинэчлэл хэрэгтэй бөгөөд засаглалын буюу хууль эрх зүйн орчинг боловсронгуй болгох ажилд өнгөрсөн жилүүдэд ихээхэн дэвшилт гарсныг онцлов.

Эрүүл мэндийн даатгалын тухай хууль /шинэчилсэн найруулга/ хэрэгжиж эхэлснээр эмнэлэг эмчээ сонгох эрх даатгуулагчид бий болсон, тусламж үйлчилгээний багц өргөжиж, эмнэлэгүүд тусламж үйлчилгээг хэр чанартай, хэдий тооны хүнд үзүүлсэн гэдэг үр дүнгээрээ санхүүжилтээ авахаар зохицуулсан, эрүүл мэндийн даатгалын бие даасан байдлыг шийдвэрлэсэн гэх зэрэг бодлогын түвшний таатай өөрчлөлтүүд бодитоор бий болсон. Мөн Эмнэлэгийн тусламж үйлчилгээний тухай хуулийг дөрөвдүгээр сард хэлэлцүүлэн батлуулахаар ажиллаж буй нь иргэдэд үзүүлэх тусламж үйлчилгээг сайжруулахад бодит алхам болно гэж үзэж байгаа талаар салбар хуралдааны үеэр ярьж байлаа.

Гэхдээ тусламж үйлчилгээний хүртээмж чанарыг сайжруулахын тулд үнэлгээний аргатай болох, улсын болон хувийн эмнэлэг гэсэн ялгаврыг арилгах, чанартай тусламж үйлчилгээ бүхий эрүүл мэндийн байгууллагыг урамшуулдаг санхүүгийн зохицуулалттай болох, өсөн нэмэгдэж буй эрүүл мэндийн үйлчилгээний зардлыг хэрхэн даатгалтай уялдуулах вэ зэрэг асуудлуудыг мэргэжлийн түвшинд авч хэлэлцэж, шийдвэрлэх гарцыг тодорхойлох нь зөв гэж үзлээ. Олон улсын стандартаар Дотоодын нийт бүтээгдэхүүний 5-аас доошгүй хувийг эрүүл мэндийн салбарт зарцуулах ёстой ч манай улсад 3 хувь ч хүрэхгүй байгаа тул энэ хувиарлалтын асуудлыг ч эргэж харах, бүр хуульчлах асуудлыг ярих нь зүйтэй талаар хуралдааны үеэр яригдаж байсан юм.

ХОЛБООТОЙ МЭДЭЭ
X