МОНГОЛЫН ЭДИЙН ЗАСГИЙН ЧУУЛГАНЫ САЛБАР ХУРАЛДААН “НИЙГМИЙН ДААТГАЛЫН ШИНЭЧЛЭЛ” СЭДВЭЭР ЯВАГДЛАА
МОНГОЛЫН ЭДИЙН ЗАСГИЙН ЧУУЛГАНЫ САЛБАР ХУРАЛДААН “НИЙГМИЙН ДААТГАЛЫН ШИНЭЧЛЭЛ” СЭДВЭЭР ЯВАГДЛАА
2016-03-30

Монголын эдийн засгийн чуулган зургаа дахь жилдээ Сургамж-Сорилт-Шийдэл уриан дор энэ сарын 30, 31-ний өдрүүдэд Төрийн ордонд болж байна. Монголын эдийн засгийн чуулганы эхний өдрийн  салбар хуралдааны нэг нь Нийгмийн даатгалын шинэчлэл байв.

Салбар хуралдаан нийгмийн даатгалын хуримтлалын тогтолцоо, өнөөгийн байдал, ирээдүйд бий болох эрсдэл сэдвийн хүрээнд явагдлаа. Хуралдааныг Ю Эм Си Альфа компанийн захирал Н.Монсор, Хүний хөгжил судалгаа сургалтын төвийн гүйцэтгэх захирал Ш.Мөнхцэдэн, Оюутолгой ХХК-ийн үйлдвэрчний эвлэлийн дарга Г.Баярмаа болон Монгол банк, гадаадын хөрөнгө оруулалттай компанийн төлөөлөл удирдан явууллаа.

Өнөөдөр хүүхдийн цэцэрлэг, сургууль чухал сэдэв болж байгаа бол 15-20 жилийн дараа хүн ам зүйн өөрчлөлтөөс үүдэн ахмад настны эмнэлэг, асрамжийн газар хурц асуудал болж тавигдана. Тиймээс нийгмийн даатгалын шинэчлэлийн асуудлыг чухлаар харж, нийгмийн даатгалын санд ирэх ачааллыг яаж багасгах вэ гэдэгт анхаарах нь зүйтэй гэлээ.  

Төрөөс тэтгэврийн шинэчлэлийн талаар баримтлах бодлого,  Ирээдүйн тэтгэврийн нөөц сангийн тухай хууль зэрэг сүүлийн үед хийгдэж буй эрх зүйн шинэчлэл нийгмийн даатгалын сангийн алдагдлыг бууруулахад тодорхой нөлөө үзүүлнэ гэдгийг оролцогчид дурьдаад бусад гарцуудын талаар ярилцаж, санал зөрүүтэй байдлаас үүдэн мэтгэлцээн үүссэн. Тухайлбал нийгмийн даатгалын шимтгэлийн хувь хэмжээг нэмэх, тэтгэврийн насыг нэмэх асуудал дээр салбар хуралдаанд оролцогчдын байр суурь хуваагдаж байлаа. Харин нийгмийн даатгалд шинэчлэл хэрэгтэй гэхдээ урт хугацааных байх ёстой гэдэг дээр оролцогчдын байр суурь нэгдэж байсан юм.

Монголын эдийн засгийн чуулганы хоёр дахь өдрийн хуралдаанаар Монгол улсад үндэсний эрүүл мэндийн даатгалын тогтолцоог нэвтрүүлэхийн ач холбогдол, хэрэгцээ ба арга зам салбар хуралдаан болох юм.

ХОЛБООТОЙ МЭДЭЭ
X