“ҮЙЛДВЭРЛЭЛИЙН ОСОЛ, ХУРЦ ХОРДЛОГО, МЭРГЭЖЛЭЭС ШАЛТГААЛСАН ӨВЧИН, ТҮҮНЭЭС УРЬДЧИЛАН СЭРГИЙЛЭХ НЬ” СЭДЭВТ ЭРДЭМ ШИНЖИЛГЭЭНИЙ ХУРАЛ ЗОХИОН БАЙГУУЛАВ
“ҮЙЛДВЭРЛЭЛИЙН ОСОЛ, ХУРЦ ХОРДЛОГО, МЭРГЭЖЛЭЭС ШАЛТГААЛСАН ӨВЧИН, ТҮҮНЭЭС УРЬДЧИЛАН СЭРГИЙЛЭХ НЬ” СЭДЭВТ ЭРДЭМ ШИНЖИЛГЭЭНИЙ ХУРАЛ ЗОХИОН БАЙГУУЛАВ
2020-01-20

Нийгмийн даатгалын ерөнхий газрын дэргэдэх Эмнэлэг хөдөлмөрийн магадлах төв комисс нь Хөдөлмөрийн яамны харъяа Хөдөлмөрийн эрүүл мэнд судлалын төвтэй хамтран Нийгмийн даатгалын шинэ тогтолцоо үүсч хөгжсөний 20 жилийн ой, Дэлхийн эмч нарын өдрийг тохиолдуулан 2015 оны 3 дугаар сарын 31-ны өдөр “Даатгуулагч (иргэн)-ийг үйлдвэрлэлийн осол, хурц хордлого, мэргэжлээс шалтгаалсан өвчнөөс урьдчилан сэргийлэх нь” сэдэвт эрдэм шинжилгээний хурлыг зохион байгуулав.

Уг хуралд Нийгмийн даатгалын ерөнхий газрын дарга Ц.Уртнасан, Хөдөлмөрийн яамны Хөдөлмөрийн харилцааны бодлого зохицуулалт газрын дарга Б.Алимаа, Эмнэлэг хөдөлмөрийн магадлах төв комисс, Нийгмийн даатгалын ерөнхий газрын газар, хэлтсийн болон дүүргүүдийн Нийгмийн даатгалын хэлтсийн дарга, магадлагч эмч нар, Хөдөлмөрийн эрүүл мэнд судлалын төвийн эмч, мэргэжилтнүүд, Анагаахын шинжлэх ухааны үндэсний их сургуулийн Нийгмийн эрүүл мэндийн сургуулийн багш, магистрант, оюутнууд оролцов.

 

Эрдэм шинжилгээний хуралд нийт 12 судлаачийн илтгэлийг хэлэлцүүлснээс Н.Мөнх-ундрах, О.Янжмаа нарын /Багануур сувилал/ “Багануур ХК-ний ажиллагсдын  мэргэжлээс шалтгаалсан өвчний улмаас хөдөлмөрийн чадвар алдалтын байдал, түүнээс урьдчилан сэргийлэх үндсэн чиглэлийг тодорхойлох нь” сэдэвт бүтээл тэргүүн байранд, Д.Хишигтогтох /ХЭМСТ/ “Бор-өндөр УБҮ-ийн ажилчдад силикоз өвчний улмаас хөдөлмөрийн чадвар алдсан байдлыг судалсан нь” сэдэвт бүтээл дэд байранд, Б.Насанжаргалын /ХЭМСТ/ “Саркоидоз” тохиолдолын судалгаа гуравдугаар байранд тус тус шалгарав.

Мөн Г.Бурмаа /ХЭМСТ/, Ц.Гансүх /ЭХМТК/ нарын “Монгол улсын хэмжээнд 2009-2014 онд оношлогдсон мэргэжлээс шалтгаалсан өвчлөл, тэтгэвэр тэтгэмжийн байдалд хийсэн судалгаа”, Г.Эрдэнэсувдын /ХЭМСТ/ “Уул уурхайн салбарын хөдөлмөрийн аюулгүй байдал” сэдэвт илтгэлүүд тусгай  байранд шалгарав.

Эрдэм шинжилгээний хурлаар МХЕГ-ын улсын ахлах байцаагч Г.Баяраагийн “Үйлдвэрлэлийн ослоос урьдчилан сэргийлэх нь”, ХЭМСТ-ийн мэргэжилтэн Ц.Цэнд-Аюуш нарын “Хөдөлмөрийн чадвар түр алдалтын өвчлөлийн судалгаа”, АШУИС-ийн НЭМС-ийн Орчин хөдөлмөрийн эрүүл ахуйн магистрант Г.Зоригтбаатарын “Төмрийн хүдрийг хуурай аргаар баяжуулах үеийн эрүүл мэндийн нөлөөлөл” сэдэвт илтгэлүүд нь хөдөлмөрийн аюулгүй ажиллагаа, эрүүл мэндийн салбарын тулгамдсан асуудлуудыг хөндөн, шийдэлд хүрэх арга замыг тодорхойлохыг зорьсноороо онолын болон практикийн ач холбогдолтой байв.

 

Хурлын үйл ажиллагааг “Эрүүл мэнд”, “За”, “TV9” телевиз, МҮОНР зэрэг олон нийтийн мэдээллийн хэрэгслээр нэвтрүүлэв.

Цаашид үйлдвэрлэлийн осол, мэргэжлийн шалтгаалсан өвчнөөс урьдчилан сэргийлэх, бууруулах, хөдөлмөрийн аюулгүй байдал, эрүүл ахуйн нөхцлийг сайжруулахад эрдэмтэд судлаачдыг татан оролцуулах, нотолгоонд суурилсан судалгааны ажлыг эрчимжүүлэх зорилгоор эрдэм шинжилгээний бага хурлыг жил бүр хамтран зохион байгуулахаар тогтов.

Уг хурлыг хамтран зохион байгуулсан Хөдөлмөрийн эрүүл мэнд судлалын төв, Анагаахын шинжлэх ухааны үндэсний их сургуулийн Нийгмийн эрүүл мэндийн сургуулийн хамт олон болон илтгэл хэлэлцүүлсэн нийт судлаач нарт талархал илэрхийлж, цаашдын ажилд нь амжилт хүсье.

 

 

 

ЭХМТК

ХОЛБООТОЙ МЭДЭЭ
X