Нийгмийн даатгалын архив бүрэн цахимжина
Нийгмийн даатгалын архив бүрэн цахимжина
2019-11-19

     Нийгмийн даатгалын тухай хууль 1995 онд хүчин төгөлдөр болсноос хойш ажил олгогчид шимтгэл төлсөн тухай тайлангаа нийгмийн даатгалын байгууллагад цаасан хэлбэрээр гаргаж өгч эхэлсэн.

     Гэвч тус тайланг 2006 оноос эхлэн нийгмийн даатгалын байгууллагын мэдээллийн санд байршуулж эхэлсэн тул  1995-2005 онуудын хоорондох ажил олгогч болон даатгуулагчийн мэдээлэл програмд бүрэн ороогүй байсан юм.

    Үүнээс үүдэн даатгуулагч тухайн жилүүдэд шимтгэл төлж, ажилласан мэдээллээ архиваас шүүлгэхэд хугацаа зарцуулж, хүндрэл учирдаг байсан бол нийгмийн даатгалын тогтолцооны шинэчлэлийн хүрээнд эдгээр цаасан суурьтай баримт бичгийг дижитал бүртгэлд бүрэн шилжүүлэхээр боллоо.

     Одоогийн байдлаар Сонгинохайрхан, Багахангай, Налайх дүүргүүдийн Нийгмийн даатгалын хэлтийн архивыг бүрэн цахимжуулсан ба цаашид 21 аймаг 9 дүүргийн буюу нийт салбарын хэмжээний баримт бичгийг дижитал бүртгэлд шилжүүлнэ.

     Ингэснээр даатгуулагч архивын баримтаа чирэгдэлгүй шуурхай авах боломж бүрдэхээс гадна өөрийн шимтгэл төлж ажилласан жил, цалин орлогын мэдээлэлдээ тулгуурлан тэтгэврийн тооцооллоо хийх нөхцөл бүрдэх юм. 

     Дашрамд дурьдахад тэтгэвэр, тэтгэмжээ тогтоолгохын тулд өмнө нь иргэд аймаг, дүүргийн хэлтэс хооронд архивын материалаа өөрсдөө хөөцөлдөн бүрдүүлдэг байсныг шинэчилж, хэлтэс хоорондоо даатгуулагчийн өмнөөс мэдээлэл солилцдог болсон ба архивын баримт ийнхүү бүрэн цахимжвал энэ ажил улам хялбарших юм.

ХОЛБООТОЙ МЭДЭЭ
X