Нийгмийн даатгалын салбарын удирдах ажилтнуудын сургалт, зөвлөгөөн боллоо
Нийгмийн даатгалын салбарын удирдах ажилтнуудын сургалт, зөвлөгөөн боллоо
2020-01-20

       Нийгмийн даатгалын салбарын удирдах ажилтнуудын сургалт, зөвлөгөөн 2019 оны 02 дугаар 22-ны өдөр Улаанбаатар хотод боллоо. Нийгмийн даатгалын хууль тогтоомжийн хэрэгжилт, шинэчлэл, нийгмийн даатгалын сангийн орлого, зарлагын гүйцэтгэл, үйл ажиллагаа, үйлчилгээний чанар, хүртээмжийг сайжруулах чиглэлд хэрэгжүүлж буй ажлууд, аймаг дүүргийн нийгмийн даатгалын хэлтсүүдийн 2018 оны ажлын үр дүн болон энэ оны салбарын зорилт зэрэг өргөн сэдвийн  хүрээнд зөвлөлдсөн тус үйл ажиллагаанд 53 удирдах ажилтан оролцлоо.

       Нийгмийн даатгалын санд  2018 онд 2.1 их наяд төгрөгийн орлого төвлөрүүлж,  орлогын төлөвлөгөөг 150 гаруй тэрбум төгрөгөөр давуулан биелүүлсэн ба 1.8 их наяд төгрөгийн тэтгэвэр, тэтгэмж,  төлбөр, зардлыг санхүүжүүлэн 645.5 мянган даатгуулагчид үйлчилгээ үзүүлсэн байна.

       Нийгмийн даатгалд 45 мянган ажил олгогч нийтдээ 1112,3 мян.даатгуулагчийг хамруулсан ба малчны хамралт нэмэгдэж, 2018 онд 4600 малчин нийгмийн даатгалд шинээр хамрагджээ.

      2018 он - “Цахим үйлчилгээг хөгжүүлэх жил”-ийн хүрээнд төлсөн шимтгэл, авсан үйлчилгээнийхээ мэдээллийг хянах боломж бүхий “Нийгмийн даатгал” гар утасны аппликэйшнийг хэрэглээнд нэвтрүүлсэн, даатгуулагч нийгмийн даатгалын лавлагаагаа гэрээсээ ч авах боломжтой болсон, ажил олгогчид тайлангаа тоон гарын үсэг ашиглан илгээж, хэлтэс рүү очих шаардлагагүй болсон, тэтгэвэр тогтоох хугацааг 3 дахин хурдасгаж, нийгмийн даатгалын үйлчилгээг үдийн цайны завсарлагаагүй хүргэж эхэлсэн зэрэг ажил олгогч, даатгуулагчдынхаа ажлыг хөнгөвчилж, цагийг хэмнэсэн олон ажлууд хийсэн.

     2019 оныг “Танд ойрхон- Найрсаг үйлчилгээний жил” болгон зарласан бөгөөд цааснаас татгалзаж, мэдээллийг цахимжуулах, иргэдийн ажлыг хөнгөвчлөх, ажилтнуудынхаа харилцаа, ёс зүйг сайжруулахад анхааран ажиллана. Энэ онд сайн дурын даатгуулагч гэрээгээ онлайнаар сунгах, тэтгэвэр тогтоолгох хүсэлтэй иргэн цахимаар маягт бөглөн, материалаа бүртгүүлэх, архивын лавлагаа авахын тулд даатгуулагч өөрөө хөөцөлдөх биш, даатгуулагчийн өмнөөс хэлтсүүд хоорондоо цахимаар мэдээлэл солилцох боломжийг бүрдүүлэн ажиллах юм.

       Өнгөрсөн жилийн ажлын гүйцэтгэлийг үнэлэн, анхаарах асуудлаа зөвшилцсөний эцэст Нийслэлийн нийгмийн даатгалын газрын дарга болон аймгуудын Нийгмийн даатгалын хэлтсийн дарга нартай гүйцэтгэлийн төлөвлөгөөнд гарын үсэг зурснаар сургалт, зөвлөгөөн өндөрлөлөө.

ХОЛБООТОЙ МЭДЭЭ
X