МОНГОЛ УЛС БОЛОН БҮГД НАЙРАМДАХ СОЛОНГОС УЛСЫН ЗАСГИЙН ГАЗАР ХООРОНДЫН БАЙГУУЛСАН НИЙГМИЙН ХАМГААЛЛЫН ТУХАЙ ХЭЛЭЛЦЭЭР, ХАРИЛЦАН ОЙЛГОЛЦЛЫН САНАМЖ БИЧГИЙН ХЭРЭГЖИЛТИЙН ЭЭЛЖИТ УУЛЗАЛТЫН ТОХИРОЛЦООНЫ ПРОТОКОЛД ГАРЫН ҮСЭГ ЗУРАВ
МОНГОЛ УЛС БОЛОН БҮГД НАЙРАМДАХ СОЛОНГОС УЛСЫН ЗАСГИЙН ГАЗАР ХООРОНДЫН БАЙГУУЛСАН НИЙГМИЙН ХАМГААЛЛЫН ТУХАЙ ХЭЛЭЛЦЭЭР, ХАРИЛЦАН ОЙЛГОЛЦЛЫН САНАМЖ БИЧГИЙН ХЭРЭГЖИЛТИЙН ЭЭЛЖИТ УУЛЗАЛТЫН ТОХИРОЛЦООНЫ ПРОТОКОЛД ГАРЫН ҮСЭГ ЗУРАВ

      Нийгмийн даатгалын ерөнхий газар болон Бүгд Найрамдах Солонгос Улсын Үндэсний тэтгэврийн үйлчилгээний байгууллагын төлөөлөгчид 2018 оны 10 дугаар сарын 18-аас 19-ний өдрүүдэд хоёр улсын Засгийн газар хооронд байгуулсан Нийгмийн хамгааллын тухай хэлэлцээрийн үр дүнг дээшлүүлэх зорилгоор Бүгд Найрамдах Солонгос Улсын Сөүл хотод уулзалт хийлээ.

      Тус уулзалтад Нийгмийн даатгалын ерөнхий газрын дарга Д.Зоригт, дэд дарга Г.Саран, дэд дарга Т.Батмөнх, Бодлогын хэрэгжилт судалгааны газрын дарга Ц.Ганцэцэг, Дотоод аудит, мониторингийн газрын дарга Ц.Алтангэрэл, БНСУ-ын Үндэсний тэтгэврийн үйлчилгээний байгууллагын Олон улсын хамтын ажиллагааны төвийн дарга Ким Жон Хү, захирал Ким Ёонг Еил, дэд захирал Юнг Ми Ра, менежер Квон Сонг А, БНСУ дахь Хөдөлмөр, нийгмийн хамгааллын үйлчилгээний төвийн дарга Д.Баярмандах зэрэг хоёр улсын төлөөлөгчид оролцов.

       Уулзалтаар Нийгмийн хамгааллын тухай хэлэлцээрийн үр ашгийг дээшлүүлэх талаар санал солилцон, харилцан зөвшилцөж, хэлэлцээрийн холбогдох заалтад өөрчлөлт оруулах, цаашид хэлэлцээрийг өөрчлөх, хамтран ажиллах хэд хэдэн асуудал дээр үр дүнтэй тохиролцоонд хүрч, тохиролцооны протоколд гарын үсэг зурав. Үүнд:

  1. Хэлэлцээрт хоёр орны иргэд тэтгэврийн даатгалд шимтгэл төлөхөөс харилцан чөлөөлөгдөх хугацааг 96 сар /8 жил/ гэж заасан байсныг нийт 108 сар буюу 9 жил болгож өөрчлөв.
  2. БНСУ-аас тэтгэвэр авч байгаа Монгол Улсад оршин сууж буй Монгол Улсын иргэдэд тэтгэврийг нь олгохын тулд шаардлагатай мэдээллийг НДЕГ-аас хүргүүлж байхаар тохиролцов.

       Түүнчлэн хоёр улсын иргэдийн тэтгэвэр авах нөхцөлийг сайжруулах зорилгоор одоо хэрэгжиж буй хэлэлцээрийг хоёр улсад тэтгэврийн даатгалын шимтгэл төлсөн хугацааг нэгтгэн тооцох чиглэлээр өөрчлөх саналыг хоёр улсын Засгийн газруудад уламжлахаар тохиролцсон байна.

       Энэхүү уулзалт нь БНСУ-д хөдөлмөрийн гэрээгээр ажиллаж буй 6 мянга гаруй, албан ёсоор хөдөлмөр эрхэлж буй 1,9 мянга орчим Монгол Улсын иргэдийн нийгмийн хамгааллын хувьд зайлшгүй шаардлагатай асуудлыг шийдвэрлэсэн чухал ач холбогдолтой боллоо.

ХОЛБООТОЙ МЭДЭЭ
X