Нийгмийн даатгалын ерөнхий газар “Төрийн байгууллагын бүтээмж-чадавхийг бэхжүүлэх асуудал” олон улсын чуулганд оролцов
Нийгмийн даатгалын ерөнхий газар “Төрийн байгууллагын бүтээмж-чадавхийг бэхжүүлэх асуудал” олон улсын чуулганд оролцов
2020-01-20

       Монгол Улсын Засгийн газрын Хэрэг эрхлэх газар, Хөдөлмөр, нийгмийн хамгааллын яам, Азийн бүтээмжийн байгууллага, Монголын бүтээмжийн байгууллага, Швейцарын хөгжлийн агентлаг, Удирдлагын академи хамтран “Төрийн байгууллагын бүтээмж-чадавхийг бэхжүүлэх асуудал” Олон улсын чуулганыг 2018 оны 05 дугаар сарын 30-ны өдөр зохион байгуулав.

       Чуулганд төрийн захиргааны байгууллагын төлөөллүүд болон аймаг, дүүргийн Засаг даргын Тамгын газар, Иргэдийн төлөөлөгчдийн хурлын удирдлагууд оролцов.

       Монгол Улсын сайд, Засгийн газрын Хэрэг эрхлэх газрын дарга Г.Занданшатар чуулганд хэлсэн үгэндээ Засгийн газрын тэргүүлэх зорилтын нэг бол засаглалын шинэчлэл, цахим шилжилт буюу төрийн байгууллагын бүтээмжийг нэмэгдүүлж төрийн үйлчилгээг шуурхай, илт тод, нээлттэй, хүнд сурталгүй хүргэх асуудал юм гэдгийг онцлон дурдав.

       Уг чуулганд Шри Ланка улсын Нийгмийн сүлжээ, мэдээллийн яамны Төрийн нарийн дарга Тилака Жаяасундара, Канад улсын Манитоба мужийн Төрийн захиргаа, санхүү, төвлөрсөн үйлчилгээний газрын Инноваци, үйлчилгээний хэлтсийн захирал Гай Гордон нар төрийн байгууллагын бүтээмжийн олон улсын чиг хандлагын талаар мэдээлэл хийж, Монголын төрийн байгууллагын бүтээмжийг дээшлүүлэхэд зөвлөгөө мэдээлэл өгөв.

       Нийгмийн даатгалын ерөнхий газар нь “Төрийн байгууллагад чанарын удирдлагын тогтолцоо ISO 9001:2008 олон улсын стандартыг нэвтрүүлсэн туршлага” сэдвээр илтгэл тавьж, нийгмийн даатгалын салбарт Чанарын удирдлагын тогтолцоог хэрхэн хэрэгжүүлж байгаа талаар туршлагаа хуваалцав.

       Чанарын удирдлагын тогтолцоог хэрэгжүүлснээр нийгмийн даатгалын үйлчилгээний нэр төрөл нэмэгдэж, үйлчилгээний ээлтэй орчныг бүрдүүлэн ажиллаж байна. Түүнчлэн, нийгмийн даатгалын үйлчилгээний уялдаа холбоо сайжирч, бүтээмж чанарыг дээшлүүлэх чиглэлээр эерэг өөрчлөлт гарсаар байна.

       Нийгмийн даатгалын салбарт олон улсын ISO 9001 стандартад нийцсэн Чанарын удирдлагын тогтолцоо нэвтрүүлэх зорилт тавин ажилласнаар 2018 оны 05 дугаар сарын байдлаар Нийгмийн даатгалын ерөнхий газар, Хан-уул дүүрэг, Дорнод, Төв, Орхон аймгийн Нийгмийн даатгалын хэлтсүүд олон улсын болон дотоодын аудитын байгууллагаар баталгаажилт хийлгэн Чанарын удирдлагын тогтолцоо нэвтрүүлсэн батламжаа авч үйл ажиллагаагаа тасралтгүй сайжруулан ажиллаж байна.

       Цаашид нийт аймаг, дүүргийн Нийгмийн даатгалын байгууллагад олон улсын ISO 9001:2015 стандартад нийцсэн Чанарын удирдлагын тогтолцоог нэвтрүүлж даатгуулагчдынхаа итгэл найдвар, сэтгэл ханамжаар үнэлэгдэх нийгмийн даатгалын үйлчилгээг үзүүлэхээр зорин ажиллаж байна.

ХОЛБООТОЙ МЭДЭЭ
X