Манай орны ихэнх нутгаар их хэмжээний цас орж, цаг агаарын байдал хүндэрсний улмаас хөдөө орон нутагт зуд нүүрлэж, хүйтний эрч чангаран гамшгийн нөхцөл байдал үүсээд байгаа билээ.
Үүнтэй холбогдуулан Нийгмийн хамгаалал, хөдөлмөрийн сайд Т.Ганди Улсын онцгой комиссоос нийт ард түмэнд хандаж гаргасан уриалгыг дэмжиж ажиллахыг яам, харьяа агентлаг, төслийн удирдлагуудад даалгалаа.
Уг албан даалгаварт малчдад хандив, тусламж үзүүлэх ажлыг хариуцсан салбар байгууллага, хамт олны хүрээнд зохион байгуулах, хөдөө орон нутгийн ажилгүй иргэдийг туслах малчнаар ажиллуулах, өвс тэжээл ачиж буулгах, малын хашаа, хороо дулаалах, зам, даваа гүвээ цэвэрлэх зэрэг ажлыг холбогдох хууль, батлагдсан төсөв, нийтийг хамарсан ажлын хүрээнд ажилгүй иргэдийг Хөдөлмөр эрхлэлтийг дэмжих сангаас цалинжуулан ажиллуулах юм байна.
Мөн орон гэргүй, хараа хяналтгүй тэнэмэл иргэд, хүүхэд, эмзэг бүлгийн иргэдийг дулаан өвөлжүүлэх, тэднийг хүнсний нэмэлт бүтээгдхүүнээр хангах  талаар шат дараатай арга хэмжээ авах, гудамж талбайд бий болсон хальтиргаа, гулгааг багасгах, иргэдийг унаж бэртэхээс сэргийлэх үүднээс байгууллагын ойролцоох нийтийн эзэмшлийн зам, талбайг цэвэрлэх ажлыг зохион байгуулж хяналт тавьж ажиллахаар болсон тухай Нийгмийн хамгаалал, хөдөлмөрийн яамны хэвлэлийн албанаас мэдээллээ.