Нийгмийн даатгалын ерөнхий газраас 1960 оноос хойш төрсөн хүмүүст нэрийн дансных нь талаарх мэдээлэх хуудсыг илгээхээр болжээ. Энэ талаар тус газрын Мэдээлэл, тооцоолол, сургалтын төвийн захирал Г.Хүрэлбаатараас тодрууллаа.

-Иргэдэд нэрийн дансны Мэдээлэх хуудас өгөхөөр болжээ. Энэ хуудсанд ямар ямар мэдээлэл байх юм бол?
-1960 он ба түүнээс хойш төрсөн даатгуулагчийн 2008 оны жилийн эцсийн байдлаарх тэтгэврийн даатгалын шимтгэлийн нэрийн дансны мэдээлэх хуудсыг удахгүй иргэдэд хэвлэн хүргэх гэж байна. Энэ хуудсанд даатгуулагчийн овог, нэр, регистрийн дугаар, гарааны үлдэгдэл (2000 оноос өмнө төлж байсан тэтгэврийн даатгалын шимтгэл), эхний үлдэгдэл (2000-2007 онд төлсөн шимтгэл ба түүнд тооцсон хүү), 2008 оны хөдөлмөрийн хөлс, түүнтэй адилтгах орлого /сар бүрээр/, тэдгээрт харгалзах  тэтгэврийн даатгалын шимтгэлийн дүн, хүү, эцсийн үлдэгдлийн дүн нь бичигдсэн байх юм. Мөн даатгуулагчийн нэрийн дансны үлдэгдлийг тооцсон тооцооны аргачлал, зааврыг хамт хэвлэж хүргүүлнэ.
-Тухайн хүний нэрийн дансанд хэдэн төгрөгийн шимтгэл төлөгдөж байгааг мэдэж болох нь ээ гэж ойлгож болох уу?
-Тийм ээ. Мэдээлэх хуудаснаас гадна удахгүй нэрийн дансны талаар тодорхой мэдээлэл агуулсан вэб хуудас нээхээр төлөвлөж байгаа. Эндээс та нэрийн дансны тооцоогоо он оноор харах, шаардлагатай бол нийгмийн даатгалын дэвтэр дээрх шимтгэлийн дүнгээ оруулан өөрөө тооцож үзэх, мөн мэдээлэх хуудсанд бичигдсэн тоотой тулгаж шалгах боломж бүрдэнэ. Ингэснээр ямар нэг зөрүү байвал харьяа Нийгмийн даатгалын хэлтэс дээрээ очиж залруулах боломж гарах юм.
-Энэ ажил хэзээнээс эхлэх юм бэ?
-Бэлтгэл ажил ид явагдаж байна. Шинэ он гараад хэрэгжүүлэх төлөвлөгөөтэй байгаа. Мэдээлэх хуудсыг аймаг, дүүргийн Нийгмийн даатгалын хэлтсээс  ажил олгогчид өгч, ажил олгогч нь ажилтнууддаа дамжуулан хүргэнэ. Сайн дурын даатгалд хамрагдсан даатгуулагч харьяалах Нийгмийн даатгалын хэлтсээсээ  мэдээлэх хуудсаа авна.
-Эцэст нь нэг зүйл тодруулъя. Шимтгэлийн хүү хэд байдаг юм бэ?
-Даатгуулагчийн нэрийн дансны эцсийн үлдэгдэлд тооцох хүүгийн хэмжээг жил бүр Нийгмийн даатгалын үндэсний зөвлөлөөс тогтоодог. 2000-2006 онд жилийн хүү нь дунджаар 1.1 хувь байсан. Харин энэ онд даатгуулагчийн төлсөн шимтгэлд тооцох хүүгийн хэмжээг өсгөх асуудлыг Нийгмийн даатгалын ерөнхий газрын удирдлага болон Сангийн яам, Нийгмийн хамгаалал, хөдөлмөрийн яам, Нийгмийн даатгалын үндэсний зөвлөл хамтран ярилцаж шийдвэрлэснээр 2000-2008 оны жилийн хүүг дунджаар 12.18 хувь болгож өсгөлөө. Ингэснээр хуваарилалтын болон хуримтлалын тогтолцоогоор /Нэрийн данс нээж, түүнд хуримтлуулсан шимтгэлээрээ тэтгэврээ тогтоолгох/ тэтгэвэр тогтоолгох даатгуулагчдын тэтгэврийн хэмжээ адил түвшинд очих боломж бүрдэж байгаа юм.
Үндэсний шуудан. 2009.11.20