Нийгмийн даатгалын байгууллага эрүүл мэндийн байгууллагуудтай шинэчилсэн гэрээ байгууллаа
Нийгмийн даатгалын байгууллага болон эмнэлгүүдийн зүгээс үйлчлүүлэгч-даатгуулагч төвтэй, чанартай тусламж, үйлчилгээг хүргэх, худалдан авах үйл ажиллагаагаа боловсронгуй болгох зорилгоор Нийгмийн даатгалын ерөнхий газраас санаачлан эмнэлгүүдтэй байгуулах даатгалын гэрээг шинэчлэн турших үйл ажиллагааны хүрээнд Нийслэлийн 4 эмнэлгийг сонгон туршилтын гэрээг 1 жилийн хугацаагаар байгуулан албан ёсоор үзэглэлээ.
Уг гэрээний загварыг Нийгмийн даатгалын ерөнхий газраас Германы олон улсын хамтын ажиллагааны нийгэмлэгийн “Монгол Улсын нийгмийн эрүүл мэндийн даатгалын тогтолцоог бэхжүүлэх” төслийн дэмжлэгтэйгээр олон улсын туршлагад үндэслэн боловсруулсан байна.
Гэрээ байгуулах эмнэлэгүүдийг үйл ажиллагааны нийт зардлынхаа дийлэнх хэсгийг эрүүл мэндийн даатгалын сангаас бүрдүүлдэг, харьцангуй олон даатгуулагчдад тусламж, үйлчилгээ үзүүлдэг хоёр, гуравдах шатлалын төрийн өмчийн болон хувийн хэвшлийн эмнэлгүүдээс сонгосон байна. Эдгээр нь Улсын Клиникийн Төв Эмнэлэг, Шастины Нэрэмжит Клиникийн Төв Эмнэлэг, Хан-Уул дүүргийн Нэгдсэн Эмнэлэг, “Ачтан” эмнэлэг аж.
Гэрээг ийнхүү шинэчилснээр эмнэлгийн тусламж, үйлчилгээ даатгуулагчид чирэгдэлгүй, чанартай хүрэх, мөн даатгуулагч эрүүл мэндийн даатгалын тусламж үйлчилгээний талаарх мэдээллийг цаг алдалгүй хүлээн авч, өвчлөлөөс урьдчилан сэргийлэх, эмнэлгийн үйл ажиллагаанд хяналт тавих боломж бүрдэх үндэс суурь болох юм байна.
Түүнчлэн тус гэрээний дагуу нийгмийн даатгалын байгууллага эмнэлгийн нэхэмжлэлийг шалгах үйл ажиллагаагаа боловсронгуй болгож, эрүүл мэндийн даатгалын байцаагчдын ажлын ачааллыг нь хөнгөвчлөх боломжтой болж байгаа аж. Ингэснээр даатгалын ажилтнууд гэрээт эмнэлгүүдтэй илүү нягт хамтран ажиллах нөхцөл бүрдэж, даатгуулагчдыг мэдээллээр ханган, санал гомдлын шууд утас ажиллуулах, сэтгэл ханамжийн судалгааг тогтмолжуулах, эмнэлэгт учирч буй бэрхшээлийг судлах болон алдаа, зөрчил гарсан тохиолдолд ижил мэргэжилтний хөндлөнгийн үзлэгийг зохион байгуулж зөрчил, дутагдлаас урьдчилан сэргийлэх ажлыг хэвшүүлэх зэрэг даатгуулагчид чиглэсэн олон ажлыг хийж гүйцэтгэх боломжийг бүрдүүлж байгаа гэнэ. Нөгөөтэйгүүр, эдгээр арга хэмжээ нь Нийгмийн даатгалын байгууллагын хувьд хяналт шалгалтын уламжлалт аргаас даатгалын тусламж, үйлчилгээний чанарыг тасралтгүйгээр сайжруулах шинэ хандлагад шилжих дэвшилтэт алхам болж байгааг Нийгмийн даатгалынхан онцоллоо.
Үйлчлүүлэгч-даатгуулагчид даатгалын тусламж, үйлчилгээг чанартай хүргэх нэг хөшүүрэг нь эрүүл мэндийн байгууллагуудын үйлчилгээний соёл, эмнэлгийн мэргэжилтэн, эмч, ажилтнуудын харилцааны соёл байдаг. Иймд эмч, мэргэжилтнүүдийн эрүүл мэндийн даатгалын талаарх ойлголт, мэдлэг, мэдээллийг сайжруулах, даатгуулагчидтай хүндэтгэн харьцах ухамсрыг төлөвшүүлэх нь шийдвэрлэвэл зохих чухал асуудлуудын нэг болоод байгаа энэ үед уг гэрээ хэрэгжсэнээр эмнэлгүүдийн нийгмийн даатгалын байгууллагатай харьцахад учирдаг бэрхшээл багасах бөгөөд эмнэлэг, эмнэлгийн мэргэжилтэн, эмч, ажилтны гаргасан алдаа дутагдлыг давтан гарахаас урьдчилан сэргийлэх, бууруулахад чиглэсэн чанарын менежментийг нэвтрүүлэх хөшүүрэг болох чухал ач холбогдолтой юм байна.
